أغاني و(مش) عاجباني/ تامر النفار
الغريب إنو اللغة العربية إن كانت الفصحى أو عامية مفعمة بالكلمات، مش ناقصنا تعابير، بس الكلمات اللي بختاروها للأغاني جدا مستهلكة، من قمر لنور العيون لبحر؛ الكل بحب بالليل وبس عصوت الموج؟
أغاني و(مش) عاجباني/ تامر النفار
جوليا بطرس. غير شكل...
|تامر النفار|
تامر النفار
قبل فترة حضرت عالقناة العاشرة البرنامج الأسرائيلي “كوخاف نولاد” (متل برنامج نجوم الغد مع كتير أصفار بالميزانية).
الصراحة تفاجئت. ما كنتش عارف انو في عمق بالأغاني الأسرائيلية الدارجة، أنا كنت مفكر إنو الأغاني بتتلخص في “لخبطيه، ما تعماليلو حساب”؛ “كابارا قديش جذابة”؛ بس في أكمّن متنافس اختارو أغاني اللي نصوصها فتحت منافسي عالكتابة. أكيد في عنا أغاني اللي كلماتها جدا مؤثرة ومميزة، من جوليا بطرس، لمرسيل خليفة لإلهام المدفعي، بس اللي لفت إنتباهي بالبرنامج كان إنو لما المغني غنى، الجمهور اشترك، الكل بعرف الكلمات. فموضوعي مش عن الأغاني بشكل عام، بل عالأغاني الدارجة، الـ “مينستريم”.
عسبيل المثال، إذا كنت بحفلة راس السنة وأبو الزوز غنى “كل مرة- تامر حسني” 95% من الجمهور راح يغني معه؛ إذا غنى “مالي شغل بالسوق- إلهام المدفعي” يمكن بس طاولة واحدة راح تشترك بالغناء (مش عارف ليه عندي أحساس إنو هاي الطاولة الوحيدة اللي بدل فودكا و”إكس أل” حاطين عرق الصابات!)
فقررت أقارن بين أغانينا (الأغاني العربية الدارجة) للأغاني اللي مش إلنا (بالعبري وبالإنجليزي اللي موجودة بالميينستريم ):
1) عناوين الأغاني- إخترت 3 مغنيين عرب اللي بنسمعو كتير، دخلت على قائمة أغانيهم وقطفت كمّن عنوان أغنية بشكل عشوائي، هاي اللي طلع معي:
“روح وروح، مابقاش أنا، أرد ليه؟، الليلة دي، عودوني، بستناك، كرمالك
وألخ.. (ألخ هاي مني، لو كانت أغنية بأسم ألخ ما كنتش بكتب عن الموضوع). بقدر أكمل لبكرة، بتخيل فهمتوا الفكرة، يمكن الكلمات مش نفسها بس مقطوفة من نفس الشجرة، هاد أنو أغلب الأغاني مربوطة بموضوع الحب والغرام مش مضايقني، اللي مضايقني هو اختيار الكلمات المحدود.
الغريب إنو اللغة العربية إن كانت الفصحى أو عامية مفعمة بالكلمات، مش ناقصنا تعابير، بس الكلمات اللي بختاروها للأغاني جدا مستهلكة، من قمر لنور العيون لبحر؛ الكل بحب بالليل وبس عصوت الموج؟ ولا حد فيهم باس بالمراجيح اللي تحت البيت متلا؟ ولا واحد مارس الحب بمقعد السيارة الخلفي؟ ماشي، مثل غير مناسب، عشان حتى لو عملوها، شعبنا مش جاهز يسمعها، تعا نحكي عن شغلات أكتر مقبولة. ولا حد من الكاتبين قابل حبيبته بشي مطعم؟ ليه لما ييجي يكتب عن الموضوع بحكي عن البحر والقمر؟ ليه متلا ما يجدد ويكتب “معلقة، صحون”؟! الحلو إنو حتى أنا، إنت وإنتي مش منطقي لألنا نسمع كلمة متل معلقة بأغنية عربية، تقول هالكلمة غير قابلة للتلحين.
في كلمات “تابو” للأغاني العربية؟ ولا الأشي بس براسنا؟
ملاحظة- أكيد البحر والقمر بفتحوا أبواب الإستعارات والمجازات والتشابيه، بس بظن إنو في إستعمال زايد إلهم، والتحدي بالتجديد والإختراعات. وللمقارنة، تفضلوا أسماء أغاني قطفتها من حديقة المينستريم الغير عربية. عمدا اخترت بس أغاني حب، أغاني تجارية، وأغاني اللي كانت محتلة مراتب أولى. اختيار الكلمات جدا غير محدد وبدل على استعمال الخيال، وعلى إستعمال تذكرة الـ “بسمح لنفسي”:
Grenade (قنبلة اليد)
Someone please call 911 (حد يتصل بالشرطة)
Stuttering (بتأتئ)
زمن الأرقام (זמן של מספרים)
حجر الياقوت الأزرق (אבן ספיר)
2) مضامين الأغاني- من تملّي معاك للحلم العربي: كمان مرة، بحكي عن المينستريم مش عن الأغاني الذهبية اللي ما بسمعوا عنهم غير اللي بشتغلو بالمناجم وأصحابهم بالفيسبوك.
بشعر مرات إنو المضامين بالأغنية العربية بتتقسم بس لـ 3 أنواع: الأغلب حب، وشوي سياسة ووطني، ومرة بكل سنة بتطلع شغلة خارجة عن القاعدة متل هشام عباس “زمان وأنا صغير”، نوال الزغبي “تيا”، نانسي عجرم “شاطر شاطر”، رامي عياش وعدوية “بحب الناس الرايقة”، وإلخ…
(إذا في حد بذاكرته أغاني اللي هي مختلفة ومألوفة للجميع صححوني، بس قلبت كل الحجار اللي بذاكرتي وما لقيت شي.)
بتفهم المسؤولية اللي علينا: إحتلال، حرب، دكتاتورية، فا بننسى إنو إحنا بني آدمين، وبننسى إنو بنطلع نشوي مرات، بنروح نحلق وبنتحدث مع الحلاق عَ الحياة، بنفتش عن معنى الحياة، بنتعب من الروتين والأيام اللي بتعيد بعضها. مش كتير بنحكي بالأغاني عن أحاسيسنا المشتركة لأغلب سكان الكرة الأرضية، بنحكي شوي عن الأرض (بما إننا ممنوعين منها) وبنحكي كتير عن الحب (بما إننا ممنوعين منو). فالإحساس انو إذا الأرض تحررت واستقلينا ما ضلّ عنا على أيش نغنّي. وحاليا، كمقارنة، هاي أمثلة لمضامين من أغاني أجنبية اللي مألوفة عند الجميع ومش كانت مهمشة:
Pink Floyd – Another Brick in the wall
Jhon Lennon – Imagine
R. Kelly – I believe I can fly
Jason Derulo – Riding solo
من مواضيع عن المناهج الدراسية، إنها كمان جزء بالحكم، لـ تخيل عالم بلا تهديدات بلا جنة ونار، لـ مين قال إنو الاحلام للمغفلين، لحد أحيّي العزابية اللي عايشين لحال ومش موافقين يشاركو حريتهم.
بشعر إنو هاي المضامين ناقصة بالأغنية العربية الدارجة، والحل هو توازن، ما بين اللي تعودنا عليه لبين اللي مطنشينو، للتوازن هاد في اسم، حتى أكمّن اسم، أكمّن فرقة، فنانين عرب اللي بتكتب بشكل مختلف، مميز، مبدع، وبرأيي بوخدوش حقهم.
ولو كانو بدولة غربية كان كانوا من مصممي النصوص الجديدة، أكمّن اسم خطر ببالي:
مشروع ليلى، محمود العسيلي، وسط البلد، جوان صفدي، أوتوستراد، محمد منير، و: ______________________________________________________________________________________
__________________________________________________________________________________________________________
أكمل/ي الناقص…
3 يوليو 2011
هممممممممممم
بصرآآآآحة اقلك شغلــــة وهي انّــو للأســـف ضيّعت وقتي.
عدم المؤآآخذة انتآآ حددت أغنيتين في كل قصتــك وهآآآض مش وجهة نظــر نهآآآئي!
هآآض بعتبر أنانيّة وتكبّرر مش ررح أدخل كتير في الموضوع لأنو وصلتك الفكررة !
3 يوليو 2011
و القضيه … لأصحاب القضيه
3 يوليو 2011
أنا ما عم أحكي أنو الأغاني العربيه مانها سخيفه !!! بل هي أسخف من السخافه .. بس بظن باين أنا عن شو قصدي .. مش هيك ؟؟؟؟ .. على مبدأ راقصه بتعطي محاضره عن العفه !!!!
27 يونيو 2011
عزيزي أرسطو. أنا قرأت كتير كتب وعلى درجة عاليةمن الثقافة. ولهدا السبب بتفق مع تامر نفار انو الأغاني العربية بغالبيتها الساحقة سخيفة وبتستخف بذكاء الإنسان العربي.
27 يونيو 2011
حبيبي سيد تامر نفار … ما لح أطول حكي .. أدعوك إلى (التعرب) ..و تاني شي .. فزلكتك بلاها .. خليك ورا المايك و تروك الفلسفه لغيرك .. الشعب مش فاضيلك لحالك .. و قال صاحب قضيه ( متل ما ظنيت من قبل ).. وبنصحك تقرا كتير منيح قبل ما تحكي .. لأن اللي بيقرأ كتب و على درجه عاليه من الثقافه بيضحك عليك لما يقرأ اللي كاتبو بس نصيحه … سلام ………..مع الإحترام
30 مايو 2011
(( ثالثاً: شكله عندك عقدة نقص وشايف العرب متأخرين ))
اخ طلحة انا بحيييييييك من كل قلبي وبحب احكيلك ……
انت من احد الناس الي الها دوور كبيير جداا في تأخرنااا.
اسمحلي حبيبي لو بس اخدنا جزء صغيييير من وقتك الثمييييين ورحت على جوجل يا سيدي مابدي اغلبك واقعد اقلك نكوش وفتش لا روح على جوجل اكتب على جوجل
محمود الجريري – بدي سلام
ريس بيك – لبنان حلم
طعم الألم – 13 شهيد
رام الله اندر جراوند – نتيجة بلا شغل
الدام – مين ارهابي
محمود الجريري – شجرة الحياة
تامر نفار – انتي وانا
اكيد شايف اسماء مواضيع ما الها دخل بالموضوع الي بتحكي عنو انت بس انا معنى اني اوصلك انو الراب العربي مش بس سياسة وانك تشلح الحطة وتحطها ع راسك وتروح عالسلك وطبش عاليهود
كل الأحترامات اخي
20 مايو 2011
كلامه صحيح. وعلى فكره أغانيك كتير حلوه خاصة اللي باللغة العبرية.
20 مايو 2011
شو بدو هذا “الرابر”؟ هل “الراب” أصلا يليق بحضارتنا؟ من يصغي لموسيقى الراب أصلا؟ من الاسماء اللي ذكرتهم في الاسفل؟؟ حتى أنت وضعتهم في الاسفل فما بالك المستمعين.
19 مايو 2011
ليس بالضروره
http://www.youtube.com/watch?v=6H_J1s1bzUE
http://www.youtube.com/watch?v=hdyLjHyGqbQ
http://www.youtube.com/watch?v=u1eUQmobo18&feature=related
19 مايو 2011
موضوعك مستهلك مثل الكلمات الي بتحكي عنها
ثانياً: انتا سامع اغنيتين وبتحكم عليهم يعني تعميمك خاطئ وكلامك غير صحيح
ثالثاً: شكله عندك عقدة نقص وشايف العرب متأخرين
رابعاً: ليش ما ناقشت اغنية من اغانيك؟
خامساً: ليش اغانيكم القديمة رائعة وحاليا بعيدوا في حالكم فش اشي جديد “من الناحية النوعية”
سادساً: في فرق بين مغنى بده فلوس وشهرة ومغني بده ينبسط ويعمر ويحكي ايش ما بخطر في باله
سابعاً: معظم المغنيين الجداد كل شغلهم جديد
ثامنا: فكرت المقال يستحق القرأة بس ضيعت وقتي في قراءته
تاسعاً: انتا في المقال ما استخدمت كلمات مميزة، ليش؟
عاشراً وأخيراً: اذا قرأت التعليق اكيد اذا ما تقبلته بتقدر تفهم ليش في ناس ما بتجدد…..
19 مايو 2011
في لخبطيه!! يمكن في مواضيع أهم نكتب عنها. تانيا شو عمبتقارن جون لينون بفنانين من ههون؟ ومين هدول اللي ذاكرهن بأسفل المقال؟ مين سمع عنهم؟
19 مايو 2011
مظبوط كلام هذا الام سي. وكمان موسيقى الراب مستهلكه. كل طفل صار يقول عن حاله رابر. بس لفته حلوه من الام سي
19 مايو 2011
يعني باختصار أخينا الرابر بده الناس تكتب حرية وثوره وزينجا زينجا. وما بدك شعبنا يحب؟
18 مايو 2011
شو مع زياد الرحباني – سامي حواط – ابو يوسف كعك بعجوة
18 مايو 2011
ya3ni lazem el kateb yi3′lat 3al moslimin zai sa7bak jowan safadi?
18 مايو 2011
شاطر شاطر. بس توقعت مقال مفيد يليق بمستوى موقع قديتا.
18 مايو 2011
المقالة مش عاجباني. مثل موسيقة “الراب”. شو متعلم الرابر هذا؟
18 مايو 2011
مظبوط حكيك. أنا كمان ما بتعجبني كلمات اليوم.وخاصة كلماتك.اللي بسمعك بقول أحمد رامي كاتب المقال.
18 مايو 2011
ولكو شو مع زياد الرحباني؟؟؟؟؟ كيف نيستو تامر؟ غنّى عن كلشي بدك اياه من الخس والحشيش ولكل اشي بخطر ببالك بالحياة
17 مايو 2011
Aziz Maraka, Itar shame3, tamer abu ghazaleh, the hip hop scene in palestine and arab countries, rima khcheich, omayma, kazamada, ruba saqr, soap kills, ………etc
and emerging..
17 مايو 2011
اسطورة يا تامر نفار , النفار جوت تالينت