إسمعي يا ستي/ فراس خوري

يونيو 28, 2011 مواضيع ساخنة, نثر | 1 comment

الجزر بيقوي النظر...

|فراس خوري|

العسل مش عم بساعدني على وجع الحلق.

الشاي مش عم بخفف وجع البطن.

البابونج مش عم بروّقني، وهبوة الببونج مش عم بتفتحلي مناخيري.

المريمية مش عم بتوقفلي السّهال.

ولا نوع خضرا بمشّيلي معدتي وقت المساك.

إذا ضغطي عالي الثومة مش عم بتوطّيه، وإذا ضغطي واطي القهوة مش عم بتّعليه، القهوة حتى مش عم بتصحّيني.

الخيار مش عم بقيملي الحرقة ولا حتى الحليب.

مغطس مي وملح مش عم بقيملي الباصور ولا عم بقطع بالفطريات.

الزيت مش عم بقوّي جسمي ومش عم بصير أناطح حيطان.

الزيت برضو مش عم بغذي شعري ولا منيح لجلدي حتى.

دَهن العرق على بطني مش عم يقيملي النفاخ.

ودهن الرُب بسقف حلقي مش عم بقيملي الحماوي.

الحامض مش عم بساعدني على النزل، ولا أيّ نوع حمضيات.

الملوخية مش عم بتهيّجني جنسياً.

والجرجير مش عم بقويلي الإنتصاب.

ولا الكاشيو.

بس الجزر يا ستي…

الجزر عم بقوّيلي النظر.

عم بشعر بالإيشي يوميًا؛

كل جزرة باكلها عم بتقويلي النظر!

عم بشوف أحسن! عم بشوف أوضح

عم بعملّي الفوكس أعلى.

عم بحس عيوني HD. كلشي حاد حوالي.

اِبتداءً من مبارح صرت أقدر أخترق الحيطان بعيوني.

فليحيا الجزر يا ستي.

فليحيا الجزر!