مَحلاها المصالحة.. كيّفنا / علاء أبو دياب
يا إما البلد رح تمشي عالإسلام وساعتها خلينا نمشي إحنا كمان، نمشي من هون طبعاً مش نمشي عالإسلام!
مَحلاها المصالحة.. كيّفنا / علاء أبو دياب
"نتطلع إلى مصلحة شعبنا.." بس كل واحد ع جهة
|علاء أبو دياب|
الحمدلله تمت المصالحة على خير، يعني بغض النظر عن موضوع مين يقعد جنب مين ومين يحكي ومين ما يحكيش، بس تمت على خير، وهادا هو الاهم، بس اسمحولي هون اناقش تلات نقاط لفتت نظري بموضوع المصالحة.
النقطه الأولى ، شو الخلاف!؟ وين الخلاف!؟ على ايش الخلاف!؟ فتح بدها سلام وحماس بدها هدنة طويلة الأمد، أطول من الأمد، أو بالأحرى هدنة طويلة الأبد، شو يعني؟ بشو أفرقتوا عن بعض؟ هادا يا جماعة الخير موضوع لغوي صرف بتحلوا بينكم في مجمع اللغة العربية، ما هو مش معقول كل ما تنين إختلفوا على شو أسم شغله يموتلوا 200 واحد، مثلاً إحنا بالقدس بنقول تلاجه وبالشمال بقولوا برّاد، يامحلانا وإحنا سالخينها إنقسام ومدابح عشان هالشغله!
إنو شو دخلنا إذا أوباما عمل فيك زي أغنية “نزلتينا لنص البير وإقطعتي الحبله فينا” ليش إحنا اللي نقول “ويلي ويلي ويلي”
طيب إذا مش عالمسميات والرؤيا الأستراتيجية يبقى بدوا يكون عالفكر والأيدولوجيا، على عيني وراسي، فتح علمانية، بس مستحية بالموضوع، وبنزل بيان بأسم العاصفة بهدد الشهيد جوليانا لأنو خالف ديننا الحنيف، وولا حدا بكل فتح بجيب سيره ولا بزعل -مع إنو لو كان البيان ضد ضابط الأرتباط العسكري الأسرائيلي المسؤول عن جنين كان طالوا اللي كتبوا من حضن إمو ودبحوه دبح حلال حسب الشريعة الاسلامية- ومع ذلك يلا بنمشيها فتح علمانية، وحماس حركة إسلامية، ماشي، إذا هادا الخلاف فياريت تتفقوا عشان نعرف البلد على شو بدها تمشي، هي بدها تكون علمانية وساعتها بتكون حماس فصيل ديمقراطي أكتر من اليسار –هاي بس مجامله، اليسار لا ديمقراطي ولا غيره، اليسار جسم إفتراضي- ، يا إما البلد رح تمشي عالإسلام وساعتها خلينا نمشي إحنا كمان، نمشي من هون طبعاً مش نمشي عالإسلام! بس لا أعتقد إنو هادا هو الخلاف لأنو ما حدا جاب سيرته أصلاً!
طيب يبقى على شو الخلاف؟ على مين مع إيران ومين مع أميركا، أو على دحلان وشلته، طول عمره في أميركا وحدا قبالها بس ولا مره صار خلاف هيك كبير، إنو أكم مناوشة هون وهناك وبتروق بس مش هيك، أما على دحلان فبرضوا أبو مازن ما بطيقه، يبقى على شو الخلاف؟ عالسلطه؟ ما همّه الجهتين جننوا سماواتنا وهمّه يقولوا نحن لا نطلب السلطه! معقول الخلاف عشان ما حدا راضي ياخد السلطه؟ برضه ما أظن..
طيب بلكي فش خلاف والقصة تكبير روس وبس!!؟؟ يا حبيبييييي إذا فش خلاف!؟ مصيبه بتكون، في ناس ماتت وفي ناس إنشلت وفيه ناس إنحبست وفي ناس إعتصمت! لا لا لا ما بدي أفكر هيك، أكيد في خلاف كبير وعميق ومستفحل وحماس وفتح مش زي البنك الربوي والبنك الإسلامي، واحد فوائد وواحد مُرابحة بس التنين بنوك!! لأ مستحيل، هدول فصيلين مقاومين وأكيد في خلاف بس أنا زلمه بسيط مش قادر أفهمه!
خليكم إصحاب بلاش بكره يتصالحوا إيران وأميركا وما تلاقي شغل لا إنت ولا هو!
النقطه التانيه، اليسار ليش صاير زي ستي إم فايز!؟ خالف تُعرَف؟ كل شي بدّوش، خلاف.. بدّوش، مصالحة؟ بدّوش، قال هاي محاصصة! طيب تعال خودلك أكم وزارة، برضه بدّوش، قال هاي مسقوفة بسقف أوسلو!! يا سلااام يعني والأنتخابات اللي دخلتوها مسقوفة قرميد!!؟؟ ما هو كلوا أوسلو، طلع أكم واحد بارك المصالحة بس اليسار وجماهيره مش عاجبهم، بالمختصر، بدّوش! مش مهم شو، المهم بدّوش، حتى هادا المقال مع إني عامل معروف وجايب سيرتهم وكأنهم فعلاً موجودين بس برضه رح يطلعلك واحد بدّوش!
النقطه التالته والأخيره، هي شخصيه شوي بس لازم أحكي فيها، يعني فش في حياة الرئيس إشي شخصي ولا لأ!؟ مش الرئيس مِلك الشعب!؟ يعني قصدي المفروض يكون مِلك الشعب! القصة ببساطه إنو سيادة الرئيس عنده نوع من الكبت أو ما بعبّر عن حاله كتير أو في حدا قامعه لا سمح الله، هادا الكبت بسبب عنده حاله من الزعرنه والرجوله المتطرفه والعنيفه لما يكون الأشي فلسطيني داخلي! يعني بالعربي بتفشش فينا! إنو شو دخلنا إذا أوباما عمل فيك زي أغنية “نزلتينا لنص البير وإقطعتي الحبله فينا” ليش إحنا اللي نقول “ويلي ويلي ويلي” وبعديها بتروح لنتنياهو بتقولوا “حكينا يا إبن الناس.. يالكلك رقه وإحساس”! إنو تزعلش مني سيادة الرئيس بس وضعك مش كتير بسمح بحركات زي “بديش مشعل يقعد جنبي” ، يعني ولا حدا بالعالم بمشيلك كلمة! لشو الزعرنة علينا؟ وقعد جنبك يا سيدي، شو صار؟ ما انتو جايين تتصالحوا، مش تفهم إني معو ضدك أو معك ضده لا قدّر الله، أنا نفسي تقوموا التنين عن ضهرنا بنفس الساعه والله، بس يعني إذا ضايلين ولابد فَ بلاها المشاكل، خليكم إصحاب بلاش بكره يتصالحوا إيران وأميركا وما تلاقي شغل لا إنت ولا هو!
هلأ سيبونا من هالحكي الفاضي، المهم تمت المصالحة وراح الأنقسام اللي سبّب على قولة المثقفين هادا الأنحدار للقضية الفلسطينية بالعالم ومنعنا من تحقيق أهدافنا، وبما إنو تمّت بس عندي طلب زغير من أهلنا بالجليل والمثلث والمخيمات ما تشتروا إلا اللي محتجينه، يعني شغل كل يوم بيومو لأنو هي الأنقسام إنتهى والتحرير كتير قريب، بلاش تتغلبوا بالتنقيل أو تدخل بضاعة من لبنان وسوريا ومصر تكون أرخص، خلص إحتياطاً إشتروا بس الضروري الضروري! هيكم شايفين الأمور مش ضايللها كتير! الإنقسام وإنتهى شو ضل بعِد!؟
بس عشان ما أكون متشائم، خليني أنعجق زي هالناس بقصص لا بتقدم ولا بتأخر، واسمحولي أهنئ العالمين العربي والإسلامي بحلول عيد إنهاء الأنقسام وحل الخلاف!!! ومبروك المصالحة، والصلح خير.. وخيرها بغيرها.. وإنشالله التمام على خير يا عمي وعقبال الشهاده الكبيره.. وبالرفاه والبنين..
ودمتم.. مش بالضروروه هون، حتى يفضّل مش هون، يا حبذا لو أبعد مكان عن هون.. بتهون.
30 يونيو 2011
أنا كمان ضد الحياة بدولة اسلامية. ومش مستعدة لو على موتي اقبل بحكم حسب الشريعة. وهاي بلادي زي ما هي بلاد المسلمين. يعيشو فيها زي ما بدهم. وانا بعيش زي ما بدي.
فش عند المعلق “مواطن” حق يقول لعلاء او لحرية الصادق يدوروا على بلد تاني اذا ما بدهن يعيشوا حسب الشريعة. احنا مش مهاجرين لعندك. احنا اصحاب البلاد ومنحبها متلك واكتر.
علاء. استمر بالكتابة لأنك اذا بطلت رح تترك فراغ كبير بالنسبة الي ولكتير ناس
7 يونيو 2011
هههههههه على قد مصيبتو بنضحك… اسلوب رائع بنقل الواقع.. شكرا لك على مجهودك
24 مايو 2011
على الرغم من اني ما بتفق معك بكل شي بس بالنهاية انت على حق يعني صارت المصالحة هي قضيتنا وانجاز سوف ندخل فيه التاريخ بدل ما نقدم خطوة عم نرجع لورا وضع مؤسف ومحزن
20 مايو 2011
أخي ,
من المعروف أن الشعب الفلسطيني معظمه من المسلمين , ربما ان النصف أو اكثر يعتبروا غير ملتزمين , ولكن يبقى النصف الاخر أو لنقل الثلث من المحافظين , اختيارك لجملة “يا إما البلد رح تمشي عالإسلام وساعتها خلينا نمشي إحنا كمان، نمشي من هون طبعاً مش نمشي عالإسلام! ” بعد العنوان الرئيسي مباشرة ,هي اهانة للمسلمين, اذا كنت علمانيا او لا تريد أن تتبع تعاليم الاسلام بدولة اسلامية , فتوجه الى أقرب دولة غير اسلامية وعيش حياتك هناك .
بتقدر تروح على دولة معظم سكانها دينهم X وتحكيلهم اذا طبقتوا الشريعة ( الاكسية ) بدي امشي ؟
طبعا بتقدر وبحكولك الله معاك كمان.
اختيارك لهذه الجملة ايضا كجملة مثيرة للجدل بعد العنوان ,ما هي الا وسيلة لجذب القراء لقراءة موضوعك الذي لم أعلم ما هدفه , أهو السخرية من الواقع , أهو التوعية , أهو … ؟
النقطه الأولى ، شو الخلاف!؟ وين الخلاف!؟
إذا كنت لا تدري على ماذا الخلاف فتلك مصيبة , لن أذكر لك جميع نقاط الخلاف ولكني سأذكر لك بعضا منها مثل الملف الأمني والمعابر الحكومة ومنظمة التحرير ( لا تشمل جميع شرائح المجتمع ) , والمعتقلين السياسيين , فإن كنت لا تعرف نقاط الخلاف هذه وكما قرأت مقالك فيبدو انك لا تعرف وذلك من خلال “هادا يا جماعة الخير موضوع لغوي صرف بتحلوا بينكم في مجمع اللغة العربية” واستشهادك بمثل الثلاجة , وان كنت تعرف هذه النقاط وتقول انك لا تعرفها فالمصيبة أكبر !!!!
“طيب إذا مش عالمسميات ( هل تعتقد أن نقاط الخلاف التي ذكرت هي فقط مسميات ومجمع اللغة العربية هو الذي يفسرها ؟؟
بالنسبة لجوليانو ,شخص كهذا وطني أكثر مني ومنك بما قدمه لشعبنا , ليس الشعب الفلسطيني هو الذي يقوم باغتياله بهذه الطريقة البشعة , كل من هو مسؤول عن مقتله لا ينتمي لهذا الشعب وفكره النضالي , وهؤلاء انما يريدون تشويه صورة الشعب الفلسطيني ونضاله عبر قتل من هم يعدون ( أجانب, وناشطي سلام ) , لتشويه صورتنا امام المجتمع الدولي وحتى قدام بعضنا البعض. المهم , مش عارف المثال لجوليانو لشو بهدف ؟؟؟ شو دخلو بالمسميات وبالايدولوويات , لا فتح ولاحماس ولا أي فصيل فلسطيني مهما كانت أيدولوجيته بسمح لحالو بقتل شخص وطني مثله.
“طيب بلكي فش خلاف والقصة تكبير روس وبس؟ ”
طبعا فيه خلاف , وزي ما حكيت انت , شكلك ” زلمه بسيط مش قادر أفهمه ”
اذا كان هدفك من المقال هو السخرية , فلا أعتقد ان جميع من “قتلوا من الطرفين – حماس وفتح ” هو محل سخرية ,ولا اعتقد ان مليون ونص بغزة اتسكرت عليهم المعابر من ال 2006 وحياتهم اصبحت لا تطاق هو محل سخرية.
بالنسبة لنقطة اليسار , بتفق معاك بمعظم الحكي , اليسار شاف انو هاي فرصته يبين على الساحة وبستغلها منيح عشان يطلع سيطه.
والاشي الشخصي رأيك وما بطلع لحدا ينقدك عليه.
19 مايو 2011
صلحهم ما بهمني بقدر ما كنت استنى أسمع برنامج الحكومة القادمة أو خطة الإنقاذ لانتشال الناس من الأوضاع الصعبة
بخصوص منتقدي لغة المقال وطريقة الكتابة ما في داعي تترحموا على ايأم المتنبي,شو كاينيين تنتظروا معلقة تنزل في تبويس الشوارب إلي صار مثلا !!!, بقولوا عنا “هيك مزبطة بدها هيك ختم”
10 مايو 2011
كنت أبحث منذ مدة عن كاتب فلسطيني ساخر يقدم وجعا، واقعا بهذه الصورة المضحكة المؤلمة، دام قلمك المبدع براقاً جريئاً، اقبل مروري وتقديري
9 مايو 2011
فشيت غلي يلعن دينك شو راسك عااااالي
8 مايو 2011
حلوه لمصالحه وحكي بجنن جد بس المهم والاهم الرواتب اهم اشي الراتب ها كيف بدنا نعيش ها
7 مايو 2011
مقال حلو كتير.. عبرت عن كتير من اللي داخلنا بطريقة بسيطة وساخرة .. خليتنا نضحك ع حالنا بجد
7 مايو 2011
مقال رائع ع الوجع ،يعطيك العافية ولا تكتب إلا باللهجة الفلسطينية الحلوة,شكرا
7 مايو 2011
مش عارف هل انت فعلا بتحاول تبسط الموضوع, ولا الموضوع فعلا معقد ولا يوجد أي مجال لنجاح المصالحة.
يجب على الجميع أن يعلم بأن الخلاف عميق, أعمق مما قد نتخيل, وبالأخص في قطاع غزة. هناك حالة من التشرذم الرهيب, ناهيك عن النسيج الاجتماعي المدمر. ربما نحن بحاجة لأجيال لإصلاح ما أفسدته هذه الفصائل الملعونة.
إلى ذلك الحين, يبقى الشارع الفلسطيني عبارة عن فصيلين, فتح وحماس, وصدقني عند عتبة أية انتخابات ستجد تلك الأفكار التي كانت تراودك عن وجود للمستقلين ما هي إلا أوهام.
6 مايو 2011
الى الاستاز المدعو طارق.
انا بأيدك انت بتحكي صح و من طريقة كتابتك باين انسان مثقف و لماح و فعلان الاستاز علاء مرفه و بايززززز اصلن هو طبقي…
بس انا بنصحك انساك من هادا الموقع و خليك على مجلة ماجد هناك بتلاقي ناس اوعى من علاء ……
تحياتي من عالم سبيس تووووووون
6 مايو 2011
يعني ممكن نعرف كيف انت بحالك بتفرق عن اليسار الي بشبه ستك في اعتراضو على كل إشي؟ في كل مقلاتك اعتراض وامتعاض ونبرة المتثاقفين البائسة.
عنجد بتساءل أنا شو الهدف من المقال؟ تحقير المنجز الهام؟ شو بدك يعني؟
ف بحياتك انزلنا من هالشرفة العالية وفرجينا كيف حضرتك بتفيد القضية (مش محسوبة سهراتك بمقاهي باريس وأوروبا ضمن المساعي لدعم القضية).
6 مايو 2011
يعني للاسف موضوع اثارنا على مدى اربع سنوات ووقف شلال الدم بين الفرقاء كان بمثابه حلم والان ترى بعض المداخلات وكأن المصالحة كانت بين شلة اصدقاء . يجب ان نرتقي لمستوى اكبر من هذا فموضوع المصالحة يعني وقف شلال من دماء الاشقاء فلنحترم ذلك وكفانا مهاترات لاتخدم احد الا للتسليه
6 مايو 2011
راااائع … أكتر من رائع حتى
أسلوبك في الطرح … أستخدامك للكلمات بروح الفكاهة.. حتى التعبير عن افكارك بالهجة العامية .. أنا بهنيك
6 مايو 2011
الى الاخ ابو علي
انا ما كتبت تعليقي بالفصحى لأني ما بعرف اكتب فصحى
و طلبت من الاخ يكتب بالفصحى عشان نفهم عليه لأنو مع الاسف في جمل ما فهمناها .
6 مايو 2011
ويحضرني القول الماثور (ما اسخم من ستي الا سيدي)
بس يا ريت لما تعرف على شو الخلاف تبقى تخبرني….عشان زهقت وانا بحاول اعرف :))
مقال جميل…يعطيك العافية
6 مايو 2011
y3ne enta shakhs bt7b bs t3ml zy el yasar 3la 2olak
wla eshe 3ajbk w bedak te3mal esas w el salam
tethbet enk fahm elle ma 7da fahmo
m3 ene shebeh bajzem enak 3aysh bl 48
e no9 klamk bl 3rbe ma bt3rf tkmlo
aw shakhs 3aysh 7aya kteeer morfaha w kol saneh akal eshe btzour orouba aw us
fa ensana mn hal gesas elle bs bt7b todkholo feha w tbyno enkm fahmeen kol eshe enta w shelet qadita tb3tk
w 2w3a tfker enu juliano eshe btet7ajaj feih , julianu kan 3′alee 3laa kteer nas w mu bl darora t3mlo mn el kh6ou6 el r2eseyeh la mwdou3ak
w t3leke el akheir 3la el makal enu tafeh wla yasta7ek el kera2a 7ta
mola7tha : lw el jehaz feh 3rbe kan ktbt bl 3rbe
6 مايو 2011
خودلك هالاقتراح لاسم هاي المقالة (شوية هبل)..
يا عمي هي ناقصة فلسفة..
6 مايو 2011
انا اتهم صاحب هذا المقال بالتهجم على الاسلام
5 مايو 2011
والله انك مسخرة وما شاء الله عنك
5 مايو 2011
عنجد مقال رائع.. كل الاحترام
5 مايو 2011
الى الاستاذ ابو السعيد
من ميزات الاخ علاء الكتابة بطريقة عامية قريبه لفهمنا.
بالاضافة انه لغتنا العربية او الادق, الي علمونا اياها وقائمين عليها ما زالو محلك سر… والسبب هو تخلفنا في كلشي… بتقدر تقولي شو معنا فرويدلو و مسجلو و بلفون سندويش… لاء و لما جينا نتفصحن عربنا السندويش لبيت شعر اسمه الشاطر والمشطور والكامخ بينهما…..
و بعد كل هاد حضرتك ما كتبت تعليقاك بالغة الفصحه…..
عفوا عزيزي لكني على يقين انك يتمزح!!!!
5 مايو 2011
يسلم تمك ابو العلا.. ايوا هيك اتحفنا ، زمان ما كتبت
5 مايو 2011
على راسك والله
بس لو تكتب بطريقة لغوية اكثر فهما بنكون مشكورين الك عمي
لانو في عنا لغة عربية فصحة و جميلة
5 مايو 2011
كتيييييييييييييييير رائع حسيت انو بياع خضرا الى كاتب هالمقال بس لاء انا عارفة انو كاتبو هيك متعمدا ….
ودمتم.. مش بالضروروه هون، حتى يفضّل مش هون، يا حبذا لو أبعد مكان عن هون.. بتهوووووووووووووووووون
5 مايو 2011
beganennnnn, ktheer 7elw ..allah y5aleeeeek ya 3alooosh