إكرام الشعب البليد دفنه

أكتوبر 27, 2010 مقالات وأخبار, مواضيع ساخنة | 6 comments

|علاء أبو دياب|

بقولوا عنا شعب عاطفي، مش قصدي الفلسطينية بس، لأ كل العرب عاطفيين، إنو تقول يعني العربي دمعته على خده ما بتنشف لا صيف ولا شتا!؟ شو دين ربه هالشعب العاطفي إلي نازل في بعضه دبح!؟ شو هالعاطفة الجياشة اللي بتخلي عراقي سني يفقع بنص أهله الشيعة ويقصف عمارهم بيوم عاشوراء!؟ بحبهم ومش قادر ما يطّمن إنو يوصلهم عالجنة واحد واحد!؟ وين كانت هالعاطفة الجياشة والسلطة بتدعس بقلوب اليسار والإسلاميين في سجون أريحا!؟ وإذا بتنسالي “من الحبّ ما قتل” بشو بتفسّرلي الطخّ بالركب والرمي عن العمارات اللي عملته “حماس”!؟ شو دين هالمحبة اللي بتخلينا ندبح بنت نامت مع واحد ونطخ بالهوى ونبارك للي قتل!؟ شو هالعاطفة اللي بتخلينا نمرق عن مخيم لاجئين معتّرين بلبنان وما نفكر نسمحلهم حتى يشتغلوا شغل محترم! هادا غير مرهفي الإحساس اللي كانوا يدبحوا بعض عالهوية.

إنو إحنا عاطفيين عشان الشعوب التانية بتقول أنا بدعم المرشح الفلاني، أو بدعم سياسات الرئيس الفلاني وما بتستخدم كلمة “بحبّ فلان” لما بتحكي عن السياسيين وإحنا بنقولها!؟ فاتح قلبه شي مرة للي بقولك بحب صدام حسين؟ طيب ولنفترض جدلاً إنو بحبه، بعمرك قلتله إنو في مصطلح تاني أسمه بدعم سياساته ورفض يستخدمه؟ وبعدين دَعَم سياستة وِلا عنّه لا دعمها، شو اللي اختلف يعني؟ ممكن لا سمح الله رئيس عربي يتغير لو ما دعمها؟ أكيد لأ، هادا امر واقع، قضاء وقدر، بدك تتعلم تتعايش معه، وأفضل مراحل التعايش معه إنك تصير تحبه! إنو شو بدك أحسن من واحد بحب قضاءه وقدره! لما تحبه ببطل مفروض عليك، ببطل مْطلعك عن دينك- بالعكس بصير حبيبك وضرب الحبيب زبيب. أقولك وخليه كِرهو يا سيدي، شو بدو يستفيد غير القهر والمقت؟

لما تحب رئيسك هادا ما إسمه عاطفة، هذا سببه ميكانيزمات دفاع الكرامة المهدورة والضعف. إسأل مين ما بدك هاي هيك أعراضها بتيجي، حب من طرف واحد ومش عذري

لما تحب رئيسك هادا ما إسمه عاطفة، هذا سببه ميكانيزمات دفاع الكرامة المهدورة والضعف. إسأل مين ما بدك هاي هيك أعراضها بتيجي، حب من طرف واحد ومش عذري.

شعبنا عاطفي، هاي تلطيف لصفات أكثر صراحة زي: مُنقاد، غشيم، مش عارف الله وين حاطه، بِنْضَحك عليه بكلمتين، بطيش على شبر مي، بِزقف للحيط الواقف. كل هادول ممكن، أمّا عاطفي؟ من وين لوين؟ من أيام الغزل العذري اللي كان يتغزل في بنت يمنعوه يتجوّزها، قيس لعنوا أبوه بكندرة لما كتبله بيتين شعر في ليلى، ورجيني ربهم لهالعاطفيين هدول تبعونك! مات قهر الزلمة قد ما جماعته عاطفيين.

أكم زلمه عربي بقول لمرته بحبك؟ أكم مَرا بتسترجي تقول لجوزها إني ما بحسّ فيك وإحنا بنعمل سكس؟ طب بلاش هاي، أنو شعب عاطفي هادا اللي الرجال فيه ممنوع تبكي ولا حتى تدمّع؟ بكون ميت إبنه وبقولوله عيب عليك شد حيلك! هو مش عشان عيب يبكي بس هادا زلمة عاطفي يعني إذا بدا بُكى هات وقفو- فيها وجهة نظر برضه. يا جماعة هاي مش بس عاطفيه هاي إمعان بالعاطفة ما سبقنا إله ولا حدا إلا هولاكو وجنكيز خان إضّل اعماركم.

لما بتشوف إشي عالتلفزيون وبتقوم بتغضب وبتطلع مظاهرة وبعدين بتروح عالبيت وكأنّ شيئاً لم يكن، وما بتستمر بنضالك ولا بتغير إشي، ولا بتسقط حكومة، ولا بنجحلك إضراب ولا بنسحب سفير ولا بتحققلك مطلب. لما رئيسك بروح بفاوض القاتل وببيع بنص شعبك وبدعس على النص الباقي وانت تاني يوم بتروح عالشغل بعد المظاهرة اللي لا قدمت ولا أخّرت، هادا ما بسموه شعب عاطفي! هادا بسموه شعب بليد.. شعب ما بحسّ.. شعب صايبه زهايمر مُزمن.. شعب بستاهل شو بصير فيه، هادا مش عاطفي هادا معطوف عليه!

أكم زلمه عربي بقول لمرته بحبك؟ أكم مَرا بتسترجي تقول لجوزها إني ما بحسّ فيك وإحنا بنعمل سكس؟

وعطفاً على ما سبق من بلادة وقلة حيلة وفشل في خلق تغيير أو محاولة جعل تحسين حياتنا الدنيا هدف ولو تكتيكي، أنا أعتقد إنو ناس عاطفيين زينا ما بتستاهل وجه الأرض، باطن الأرض اولى فينا؛ ما إحنا منها واليها، وبنقتل عالشرف وبنحرق المسرح والسينما وبنتجوّز أربعة وبنستورد ملابسنا الداخلية من الصين وبنحب الرئيس اللي كاتم على نفسنا أو مرات قاطعه بالمره عشان الهوا يكفي جماعته (الحق معه إحنا مش بس بنتنفسه للهوا وماكلينه كمان فبنسحب هوا اكتر من غيرنا)؛ لشو نكون على وجه الآرض دخلك! خلينا تحتيها أحسن إلنا ولغيرنا، وهاي كمان حلينا مشكلة المفاوضات المباشرة وغير المباشرة ولمسة اليد والبلنتي، إحنا بناخد كل فلسطين تحت الأرض، وهمه بياخدوا فوق الأرض، بطلع معانا دولتين لشعبين -الحل اللي السلطة حالفة طلاق بالتلاتة ما بتتنازل عنه حتى لو كل اليهود بطلعوا من البلد- بكون في دولة إسرائيل القابله للحياة ودولة فلسطين القابلة للموت، وهيك الكل راضي ومبسوط.

أي والله إكرام الشعب البليد دفنه!