8 أمور عن استعمال الكوندوم

نوفمبر 30, 2010 يوم الإيدز العالمي 2010 | 1 comment

1. لكل شي في وقت:

إنتبهوا لتاريخ إنتهاء الصلاحية. أيوا، في هيك إشي. إذا شريكك بيطَلّع الكوندوم من الجزدان إللي مخبيه من الصف الثامن واللي ماكل عليه الدهر وكمان شارب.. مننصحك متتكلش/متتكليش على مثل هيك كوندوم!

2. لكل شي في حدود:

إذا الكوندوم إللي بدكو تستعملوه قعد بالسيارة بحم ٥٠ درجة مئوية بعز الصيف مش من المفضل استعماله! الكوندوم لازم يكون في محل بارد وبعيد عن الرطوبة ومش معرض لأشعة الشمس المباشرة.

3. بكل شي في منطق:

الكوندوم لازم يقعد منيح، ولازم يكون لبرّا ومش لجوّا. إذا كان لجوّا راح تلبسوه بالعكس، وبالعكس مش منيح. لبستوا الكوندوم وهو بالعكس وكان في عليه سائل منوي؟ مننصحكوا تستعملوا غيرو.

4. كل شي بيمشي منيح حسب الأصول:

الأمور حميت بيناتكو وقررت تحط الكوندوم بسرعة؟ مننصحك توخذ نفس، فش إشي راح يطير من بين إيديك. إمزع غلاف الكوندوم من المحل المخصص، مش بالسنان. بعدين يمكن يزعل دكتور سنانك، ولا بأظافرك إذا كانوا طوال. وبالعربي الفصيح: إخفاقك في إتباع النصائح قد يسبب ثقب أو انزلاق الواقي- فدير بالك!

5. لكل شي في محل:

كل العضو الجنسي الذكري لازم يكون بقلب الكوندوم. ومش بس طرفو. الكوندوم مش طربوش للراس!

6. لكل شي في سبب:

طرف الكوندوم من فوق (كيس الهوا) لازم يكون فاضي. عشان هيك بتمسك طرفه بين أصابعك وبتعص عليه بس تلبسه. بهاي العملية بتضمن إنو يكون في محل كافي للسائل المنوي، غير عن هيك منسبب إنفجار!

7. لازم تسهيل الأمور:

من المفضل استعمال مادة لزجة على اساس مائي ومش الزيوت على أنواعها وبما في ذلك الفيزالين وزيوت الأطفال! المزلقات الزيتية ممكن إنو تسبب ضرر للكوندوم عشنها بتذوّب اللاتكس (المادة المطاطية الي منها مصنوع الكوندوم).

8. إطلع بالوقت الملائم:

خلصت؟ إطلع شوي شوي قبل الارتخاء، ومفضل إنك تمسك الكوندوم من القاعدة عشان ميزحلقش.

هاد هوي. منتمنى إنو قدرنا نقلك إشي جديد عن إستعمال الكوندوم.

لأيّ إستفسار يمكنكم المراسلة على البريد الإلكتروني:

b7ebk.2amn@alqaws.org