مين أنا؟

(مقطع من مسرحية “خبر عاجل” من تأليفي والتي […]

مين أنا؟

مايو 5, 2009 نثر | 2 comments

(مقطع من مسرحية “خبر عاجل” من تأليفي والتي ستبدأ عروضها في 12 أيار الجاري في مسرح “الميدان” في حيفا… المقطع يدور بين رنا، مستمعة على الهواء وبين عضو الكنيست شاكر السيد الموجود في استوديو التلفزيون… المسرحية من إخراج عامر حليحل وتمثيل: ميسرة مصري، شادي فخر الدين، حنان حلو، دريد لداوي وعنات حديد.)

رنا/

مين أنا؟… عربية، إسرائيلية… مش إنتي بتفهم بالسياسة؟

شاكر/

إنتي طبعًا يا أختي فـلسـ…

رنا/

لإنو أبوي بقلي إنو إحنا إسرائيليين وإمي بتقللي إنو إحنا عرب.

شاكر/

يعني يا أختي شوفي…

رنا/

بس أنا حاسة إني لا هاي ولا هاي.

شاكر/

طبعًا، إنتي فلسـ…

رنا/

يعني لازم الواحد يكون عربي أو إسرائيلي؟ بنفعش أكون عادية، هيك يعني خوش بوش؟

شاكر/

خوش بوش؟ لأ يا أختي، إنتي عم تحكي عن مسألة هوية وإنتماء! إنتي فلسـ…

رنا/

هديك المرة حكوا بالتلفزيون إنو هاي الهوية مش كتير comprehensive.

شاكر/

لأ يا أختي هاد تحريض عنصري على العرب!

رنا/

بس اللي كانوا يحكوا عرب…

شاكر/

معناتو إزا عرب أكيد كانوا يناقشوا المعضلة والصيرورة اللي منواجهها إحنا العرب في إسرائيل لإننا من جهة إسرائيليين ومن جهة فلسـ…

رنا/

يعني أنا إسرائيلية؟

شاكر/

لأ يا أختي، مش القصد! إنتي فلسـ…

رنا/

مإنتي قلت إسا إننا إسرائيليين!

شاكر/

مزبوط يا أختي، إسرائيليين في الانتماء التقني.

رنا/

تقني؟ يعني زي مدرسة أورط؟

شاكر/

مش القصد يا أختي، خليكي مركزة معي.

رنا/

تفضل.

شاكر/

خلينا نبدا من الأول. في الثماني وأربعين وقعت النكبة!

رنا/

بس أنا مين أنا؟

شاكر/

إنتي عربية جزء من الأمة العربية، ومسلمة جزء من الأمة الإسلامية، وفلسطينية جزء من الشعب الفلسطيني، وإسرائيلية معك هوية إسرائيلية، واسكنك من الناصرة أو حيفا إنتي جليلية، وإزا من باقة بتصيري من المثلث، وإزا من رهط صفيتي نقباوية…

رنا/

… وأنا إيش من هادول؟

شاكر/

أنتِ كل هذه الأمور مجتمعة. هذا هو غنى الفلسطيني الأصيل المتشبث بجذوره وأصوله وأرضه ومستقبله.

رنا/

وأنا هادول كمان؟

شاكر/

طبعًا!

رنا/

واو، مكنتش عارفة… لحد إسا كنت مفكر حالي بروتستانت!

2 تعقيبات