بريطانيا تعتذر / علي مواسي

مايو 15, 2013 فنون, مواضيع ساخنة | 1 comment

الحلم الفلسطيني. تصميم: sameer-kH

>

|علي مواسي|

علي مواسي

(1)

- قومي يمّا.. صارت عصر الدّنيا!

- قمت.. قمت.. قميييييييت..

تنظر في الآيفون.. رسالة وصلت “الفيسبوك”:

- بدّك كروتة لحفلة أصالة نصري؟!

- وين الحفلة؟! ولا أقولّك.. بلزمش أعرف وين.. الجواب لع.. لأنّه مفلسة.. فش مصاري أسافر على محلّ..

- شو أسافر.. الحفلة في يافا..

- تطبيع الحقيرة؟!!!!!

- شو يعني تطبيع؟!

- شو شو يعني تطبيع؟! هسّة صاحية من النّوم ومش طايقة الهبل.. إنتو طول حياتكو هيك دار أبو سليم.. مأسرلين..

- شو يعني هاي مأسرلين؟!

- إنت أدرى.. يلّا باي.. منحكي بعدين.. إمّي صرصعتني..

(2)

- ولك قومي يمّا.. بكفّي خماجة ونياطة.. أخوكِ هظوه مروّح..

- منين مروّح؟!

- شو يعني منين مروّح.. من الجيش..

- طيّب مليح.. إن شالله.. أصلًا أشكاله مش لايقله غير هيك..

- أشهد أن محمّدًا نبي.. قومي غسلي وصحصحي والحقيني.. أخوك بوصل هلكان اليوم.. نصّ ساعة بكون هون.. أبوك راح يتناوله من القطار.. يلّا خلصيني.

- اليوم السّبت.. فش قطارات.. حتّى بهاي مش عارف يكذب عليكم العبقري.. أبصر وين باقي يتخمخم طول مبيرح..

- ليش بدوش يكون قطارات السّبت يعني؟!

- اسألي شلومو.. جاي تسأليني..

- مين شلومو؟! صاحب أبوكِ في الشّغل؟!

- لع.. سيده الأوّل لشلومو صاحب أبوي.. هههههه..

- طيب، بلا سماجة..

 (3)

في الطّريق من غرفتها إلى الحمّام..

- صباح الخير ستّي..

- صباح مين والنّاس نايمين.. بنات آخر زمن..

- ييييييه عليييييناااااا..

- تعالي تعالي شوفي هاي اللّي قاتلها أخوها في الشّيخ مونّس مبيرح.

- شو ستّي.. ميخذة عالجوّ الوطني.. هههه.. شيخ مونّس ومش شيخ مونّس..

- يا كشلي عليهااااا..

- في الجامعة الصّبيّة؟! من وين؟!

- والله ما أنا دارية وين ومن وين.. إلياس كرّام بقول في الشّيخ مونّس هظوه قاعد.

- طيّب شوي وباجي.. بسّ أغسّل.. الله يرحمها عكلّ حال.. بالهبلد مننام عقتل ومنصحى عقتل صرنا..

تسأل أمها:

- يمّا فيه قهوة؟!

- خلصت.. انزلي جيبي من الدّكّانة وحياتك..

(4)

- مرحبا.. وين أبو جوزيف..

- هسّة بيجي..

- أعطيني قهوة “عيليت” لو سمحت.

- فش منها هاي الماركة.. بحياتي ما سمعت فيها.. فيه قهوة الحسيني إذا بدّك وقهوة الأنيس.

- الحسيني.. الأنيس.. هات.. المهمّ قهوة..

- قدّيش.

- 28.

- ول ول ول.. شوه القهوة هاي.. تفضّل..

- منتعاملش إلّا بالجنيه..

- ليش مصري حضرتك؟! بعدين إنت قرابة أبو جوزيف؟! (تسأل باستعجاب)

- قرابة أبو جوزيف.. آه.. ابن أخوه.. ولع مش مصري.. بالصّدفة فلسطيني.. (بفظاظة).

- طيّب فهمت فهمت.. والنّعم..

- شو هالعملة اللّي معك؟

- صينيّة.

- وبعدين إنت فلسطينيّة؟! (بفظاظة).

- شكلي روسيّة؟!

- لع.. هنديّة..

- عفوًا.. إنت من وين بتعرفني تا تمزح معي؟!

- سألتيني وجاوبتك..

- طيّب هات وسجّل عندك على دار أبو خالد.. مبيّن الحكي معك بجبش نتيجة.. لع نغش وخفيف دمّ عالآخر.. الحقّ مش عليك.. الحقّ على أبو جوزيف اللّي مقعّد مراهقين هون تستقبل زباين.. وتتخوّث.. قال منتعاملش إلّا بالجنيه!

(5)

وهي تخرج من باب المحلّ يرنّ هاتفها.

- آلو..

- ليلى؟

- مين حضرتك؟!

- ليش ماحية رقمي؟!

- قلت إنت مين؟!

- واحد جاي على باله يتعرّف عليك..

تغلق الهاتف… يرنّ من جديد.. تردّ:

- إيش بدّك؟!

- مالك معصبة.. أنا ياسر..

- أهلا ياسر.. إنت وين؟! بتحكي من برّة؟! ليش رقمك هيك؟!

- ماله؟!

- مبيّن إنّه من برّة.. ببلّش بـ 015..

- لع في البلد.. بجوز فيه مشكلة.. من يوم ما أجت شركة “زين” ودار الحريري وبلعوا الاتّصالات في البلد وهو فيه مشاكل.

- هههههههه.. “زين” ودار الحريري قلتلّلي.. المهمّ شو بدّك..

- حبّيت أعزمك على خطبتي الخميس الجاي.

- لااااااااااااااااا.. بتحكي جدّ.. بتحكي جدّ ولا بتتخوّث؟! بدّك تخطب..

-  آه..

- على مين..

- على إيناس..

- إيييييناااااس؟! ياسر.. أهلك وافقه؟! وين بدكم تعملوا الخطبة؟! في عمّان؟!

- لع في بيروت.. في بيت أهلها..

-  هههههههههه..

- يا رييييييييييييييت.. بروح ركاض وبرجعش.. بخطب أخوها لإيناس.. إلها أخوة؟! ههههه..

- لع بس بنفع ابن عمها.. هههههه..

- هههههه.

- كلّها ليلة بسّ.. وإذا بدّك ترجعي بنفس اليوم فيه مجال مع نهاية وأهلها.. مروّحين بنفس اليوم علشان ثاني يوم عندهم مناسبة.. من يوم ما فتحوا الأوتوستراد بين عكّا وبيروت بتوكلش إشي..

- يا حسرتي على حالي.. حلوة الأحلام.. إشهد يا عالم علينا  وعَ بيرووووت..

- لمين هاي الأغنية.ز لطيفة؟!

- هههههه.. لأبوي.. كيف لو مش حضرتك خرّبتني وعلّمتني على هيك أغاني..

- أعطيني بسّ شويّ وبرجعلك.. تليفون من الشّغل..

- طيّب بستنّاك أستاز ياسر.. باي..

(6)

تصل إلى البيت.

- يمّا.. ملقيتش قهوة “عيليت”.. فيه…..

تحملق في أخيها الّذي وصل البيتَ للتّوّ… تنفجر ضحكًا.

-  ولك شو.. مشارك في مسرحيّة؟! ليش لابس هيك.. عزااااا…

- يا خوثة.. هاظ اللّبس الجديد تبع الكورال..

- أيّ كورال؟!

- الكورال العسكري.. المارش..

- خخخخخخ.. يمّا النّغاشة.. وليش هاي الشّنط يا حضرة الجنرال؟! وين باقي؟!

- بتعرفيش؟!

- لع!!!

- كيف بتعرفيش؟َ!

- بعرفش..

- كنت في القدس.. تدريب لأسبوع على أغاني حفل الاستقلال..

- الاستقلال؟!؟!؟!؟!

- آه.. جايين عليه كلّ السّفرا.. عرب وأجانب.. وقرّروا السّنة يعملوه أفخم ما يكون.. لأنّه بريطانيا قرّرت تقدّملنا اعتذار.. والملكة راح تحضر الحفل.. يعني زيّ ما فرنسا قدّمت اعتذار للجزائر..

صمت..

- مين إحنا؟! استقلال مين عن شو؟!

- شو مين إحنا؟! إحنا دار يونس مثلًا؟! وزعيمتهم حضرتك مثلًا؟!.. إحنا إحنا.. الشّعب الفلسطيني..

صمت ووجوم..

- ليش صافنة.. قولي مليح اللّي فطنه بعد 65 سنة يعتذرولنا.. كانوا بدهم يعطوا البلاد لليهود.. الله ستر.. هههه..

صمت..

يتابع: وزيّ ما بقوله.. أن تصل متأخّرًا خيرٌ من ألّا تصلَ أبدًا..

بدّك تيجي؟! بطلع لعيلة كلّ عازف كرتين..

- وما بهروناش تفتيش وتحقيق؟!

- تفتيش وتحقيق؟! ليش؟! بس تمرقي من هالماكينة وكان الله بالسّرّ عليما..

(7)

- يمّا يا ليلي قومي.. صارت عصر الدّنيا!

- قمت.. قمت.. قميييييييت..

تنظر في الآيفون.. إشارة لرسالة وصلت “الفيسبوك”:

- بدّك تروحي بكرة على مسيرة العودة؟! أسجلك في الباص؟!